مثقف لبناني مغترب
زينوا الرجال بميزان الأدب
وارفعوا عنّي حمال العتب
شربل بعيني زينة الرجال
أوعا تشهقوا! وين العجب؟
شب ما بينقصو سحر الجمال
إذا شافو بيجن القصب
ولمّن بتسمع هدير الشلال
وتحس برجفه من دون سبب
فتّح عينك.. حا تشوف الهلال
أكبر.. كل ما منك اقترب
هيدا شربل.. وأمثالو قلال
بلحظه بتلاقي قلبك سلب
طيبتو.. بـ براءة الأطفال
وبضحكتو بيطفي الغضب
وبحّة صوتو الكلاّ دلال
والمليانه حنان وطرب
بشعرو الشعبي بيهد جبال
وبيبسط سهول من العنب
كل ما حوّشت وعبيت سلال
بتقلّك إسّا.. مكتبة الأدب
هيدي بضاعه بسعر المثقال
بتشتري كنوز إلماس ودهب
شربل أسد بيربي أشبال
بـ غابه زهرا صفّى حطب
شربل صوت صارخ: إسمع يا ضال
وميّز بينو وبين غراب نعب
شربل ميّ بصحرا كلاّ رمال
يا مسافر ميل عبّي القرب
لا تسأل كيف عرفت هالخصال
نور الشمس باين مهما انحجب
وصاحب الكلمه باقي بالبال
التاريخ رح يذكرو والأجيال
طول ما كلمتو بتولّد لهب
صوت المغترب، العدد 1096، 20/9/1990
**
